Një virus i ri që po qarkullon në Kinë, ka rritur ndjeshëm frikën tek qytetarët në Shqipëri. Në fakt “metapneumovirusi” prej vitesh ka qarkulluar edhe në Shqipëri dhe me gjasë e kemi prezent dhe në këtë sezon.
“Ka shumë vite që qarkullon, nuk përjashtohet mundësia, madje është e pamunudur të mos ketë ardhur në vendin tonë, sepse në studime e shumta tregon që ky virus është ne 8-15% të të gjithë virozave të stinës. E veçanta është se mund të ketë një ndryshim të vogël të strukturës i cili po studiohet”, tha epidemiologu Dritan Ulqinaku.
Shenjat e infektimit – “Në 95% të rasteve ka rrjedhje hundësh, temperaturë subfebrile, dhimbje koke, dhe në 5 % transmetohet në rrugët e poshtme që mund të kemi prekje të bronkeve dhe pneumoni”, tha Ulqinaku.
Mjeku thotë se nuk ka aspak vend për panik, por si çdo virus tjetër stinor, duhet pasur kujdes tek disa kategori me risk.
“Ky virus prek kryesisht rrugët e sipërme të frymëmarrjes, është shumë i shprehur në moshën nën 5 vjeç, por kryesisht është pak më i rrezikshëm te mosha deri në 1 vjeç. Kujdes duhet të kenë moshat mbi 65 vjeç dhe ato që kanë probleme me imunitetin”, thotë mjeku.
Be First to Comment