Mijëra njerëz të penalizuar për ndërtimet pa leje në fshat, nuk do të paguajnë gjobë. Gjobat e vendosura përgjatë 10 viteve të fundit për njerëzit që kanë ndërtuar ose kanë bërë punime në banesa pa lejen përkatëse janë fshirë.

Në “Fletoren Zyrtare” është botuar ligji që shfuqizon penalitetet e paekzekutuara deri më tani, nga autoritetet për periudhën nga data 1 janar 2015 deri më 30 Nëntor 2024.

Ligji hyn në fuqi në 16 janar dhe përfitues janë individët që kanë ndërhyrë pa leje paraprake, në ndërtime për qëllime banimi, në objekte magazinimi, përpunimi, dhe tregtimit të produkteve bujqësore dhe blegtorale.

Po ashtu, nga amnistia përfitojnë edhe individët, të cilët nuk kanë zbatuar rregullat e vendosura për COVID-19 gjatë pandemisë. Në bazë të llogaritje së bërë, vlera totale kap një shifër prej 2.5 miliard leke.